Во дводневна заедничка акција на Секторот за контрола и истраги при Царинска управа и Министерството за внатрешни работи запленети се 22 патнички моторни возила со странски регистарски таблици управувани од македонски државјани.
„Запленетите возила се од различни марки, а меѓу нив, четири се марка МЕРЦЕДЕС, три АУДИ, две БМВ, едно патничко товарно возило е марка ТЕСЛА и други, а сите возила биле управувани од македонски државјани на територија на Република Северна Македонија повеќе од 6 месеци. Против сторителите на прекршоците ќе биде поднесено Барање за поведување прекршочна постапката до надлежниот суд.“, информира Царинска управа.
Од таму појаснуваат дека во согласност со законските надлежности на Царинската управа, според критериумите и условите пропишани во Истанбулската конвенција за привремен увоз, одредби од Царинскиот закон и одредби од Уредбата за спроведување на Царинскиот закон, граѓаните на РСМ и странците можат привремено да внесат и да управуваат возило на територијата на земјава за време на нивниот престој, но, најмногу 6 месеци во период од 12 месеци, по што возилото мора да ја напушти територијата.
Во спротивно ќе треба да се пријават на најблиската царинска испостава во местото каде привремено престојуваат и да започнат соодветна царинска постапка за увоз или привремен увоз на возилото.
Преземено од: Линк
