Пилешката паштета е вкусен, кремаст намаз направен од варено или пржено пилешко месо, обично комбинирано со кромид, зачини и путер или крем сир.
Оваа пилешка паштета може да биде совршен појадок или предјадење, да се служи на коктел забави или да се јаде самостојно на тост леб или крцкави крекери.
Пилешката паштета во домашна варијанта има богат и слоевит вкус, кој дополнително можете да го надградите со суви зачини, свежи билки, сусам, маслинки, домати или други состојки што ги сакате.
Прочитајте го подолу рецептот за овој совршено избалансиран зачинет намаз, кој секако е далеку поздрав од верзијата купена во продавница:
Потребни состојки:
- 500 гр пилешко месо
- 1 главица кромид
- 2-3 чешниња лук
- 100 гр путер (омекнат)
- 100 мл крем за готвење или павлака
- сол и бибер по вкус
- 1 лажичка сенф, по вкус
- мелен пипер по вкус
- по желба магдонос или мајчина душица за декорација
Подготовка:
Сварете го пилешкото месо во солена вода додека не омекне (околу 30 минути). Потоа исцедете го и оставете го малку да се излади. На малку масло пропржете го ситно сечканиот кромид додека не стане стаклен. Додадете го мелениот лук и пржете уште една минута или две. Во блендер ставете го изладеното месо, пржениот кромид, омекнатиот путер, павлаката, солта, биберот и сенфот (ако го користите). Блендирајте додека не добиете мазна смеса. По потреба додадете повеќе сол и бибер. Префрлете ја паштетата во сад, покријте ја со најлонска фолија и оставете ја да се излади во фрижидер најмалку два до три часа пред да ја послужите.
Послужете со леб или крекери, украсете со свеж магдонос или мајчина душица и уживајте.
Пријатно!
Преземено од: GostivarPress
