Фудбалерите на Манчестер Сити неочекувано ремизираа во Ливерпул против Евертон (3:3) во натпреварот од 35-то коло од Премиер лигата, со што се оддалечија од шампионската титулата.
„Граѓаните“ влегоа во овој натпревар со шест бода помалку од Арсенал, но и со два натпревари помалку. Сепак, по нерешениот резултат, ситуацијата е појасна – сè е во рацете на „топџиите“ на три натпревари до крајот.
Гостите го наметнаа ритамот од самиот почеток, и први се заканија преку Рајан Шерки и Антоан Семењо. Иницијативата се исплатеше кон крајот на првото полувреме, кога Шерки му асистираше на Жереми Доку, кој го совлада Џордан Пикфорд со прецизен удар од работ на шеснаесетникот.
Евертон се закани од контра, а најблиску до голот беше Илиман Ендиаје, но Џанлуиџи Донарум реагираше брилијантно.
Домашниот тим успеа да израмни со многу среќа. Голема грешка на Марк Гуехи му овозможи на резервниот играч Тиерин Бери да постигне гол за 1:1.
Веднаш потоа следеше целосен пресврт. Џејк О’Брајан скокна највисоко по еден корнер и му донесе водство на Евертон.
Во 81-та минута, уште една лоша реакција во одбраната на Сити, а Бери го постигна вториот гол и зголеми на 3:1. Тогаш се чинеше дека победникот е решен.
Сепак, Ерлинг Халанд во следниот напад ја намали разликата, а во последните секунди од натпреварот, во 97-та минут Доку му донесе бод на Сити со својот втор гол.
Иако избегнаа пораз, Гвардиола нема да биде задоволен, бидејќи сега се пет бода зад Арсенал, кој има сè во свои раце во борбата за титулата.
Од друга страна, Евертон беше на дофат на голема победа, но на крајот мораше да се задоволи со бод во спектакуларен натпревар.
„Граѓаните“ ќе го пречекаат Брентфорд во следниот натпревар, додека „Карамелите“ ќе гостуваат кај Кристал Палас.
Foto/ EPA
Преземено од: TopSport
