Состојбата со водата во Гостивар без големи промени. Може да се користи како техничка, за миење и капење, но не и за пиење или за готвење. Ќе продолжи доставата на вода за пиење во шишиња за жителите на Гостивар. Ова се заклучоците по денешниот состанок на Кризниот штаб.
Водоводот беше загаден со фекални бактерии, откако со пумпи била внесена загадена вода во водоводниот систем, по што во градот изби епидемија. Сега биле детектирани бактерии псеудомонас аеругиноса кои може да бидат многу опасни, особено за луѓето со слаб имунитет.
„Таа бактерија најчесто се јавува како биофилм во цевководниот систем и најчесто се јавува од застоена вода. Со оглед на тоа дека претходно имаше забрана за водата да не се користи ниту за пиење, ниту како техничка, е очекувано истата да се јавува во примероците. Затоа е постапено согласно протоколите. Хлорот кај каптажата е качен на малку повисоко ниво, правено е во неколку последователни периоди испирање на водоводната мрежа и целиот тој процес ние го следиме континуирано како лабораторија“, вели Емилија Аневска, експерт од Скопски водовод, која помага во прочистување на водата во Гостивар.
