Над 100 милиони евра ќе чинат владините мерки за поевтино гориво. Во државната каса се собираат помалку средства од акцизи и ДДВ па затоа премиерот најави уште еден можен ребаланс на буџетот до крајот на годината.
-Очекуваме до крајот на годината да бидеме пократки 6-7 милијарди денари во однос на тоа што сме го планирале. Тоа нас ќе не чини како Буџет, според нашите пресметки, само по основ на акцизи некаде околу 5 милијарди денари, што за економија како нашата и буџет како нашиот е огромна жртва“, истакна Мицкоски додавајќи дека поради намаленот ДДВ, односно данокот на додадена вредност, таа бројка ќе биде уште поголема.
Дополнително загрижува неизвесноста околу испораката на нафта, но и цената на светските берзи, која се движи над 100 долари за барел. Сепак, Мицксоки очекува инфлацијата да се задржи на стабилно ниво и да биде под европскиот просек.
Од министерството за финансии без одговор кога може да се очекува новиот ребаланс и колку би изнесувал буџетскиот дефицит. Министерката за финансии деновиве од Њујорк изјави дека ако се одлучат има нов ребаланс – дефицит би се задржал на проектираното ниво од 4,1% од БДП , односно околу 753 милиони евра.
Според достапните информации од финансии, вкупните расходи заклучно со вчера изнесуваат околу 4,9 милијарди евра или нешто над 70% од планираните трошоци до крајот на годината веќе се потрошиле. Вкупните приходи пак изнесуваат околу 4,2 милијарди евра или 68% од предвидените.
Преземено од: Линк
