Градоначалникот на Општина Јегуновце, Димитар Костадиноски, од населеното место Жилче презентираше отчет за сработеното во изминатата година, истакнувајќи ги реализираните проекти, подобрувањето на комуналните услуги и активностите за заштита на животната средина. Воедно, најави продолжување на инвестициите и реализација на нови проекти во 2027 година.
На средбата беше посочено дека во изминатите 12 месеци се реализирани повеќе проекти во населените места во општината, финансирани од општинскиот буџет и со поддршка од централната власт.
Градоначалникот Димитар Костадиноски истакна дека реализираните активности придонесуваат за подобрување на условите за живот и создавање почиста, поуредена и попријатна општина за сите граѓани.
„Проектите што ги реализиравме се видливи и претставуваат значаен придонес за подобрување на условите за живеење во Општина Јегуновце. Сакам да им се заблагодарам на вработените во општината, на советниците и на јавното претпријатие за нивниот придонес во реализацијата на активностите во изминатата година“, истакна Костадиноски.
Тој најави дека и во наредниот период ќе продолжи реализацијата на проекти од интерес на локалното население, со очекување дека преку општинскиот буџет и поддршката од централната власт, во 2027 година ќе бидат реализирани дополнителни инвестиции.
Како што посочи градоначалникот, целта е да се реализираат проекти што ќе ги подобрат условите за живот на сите жители, без разлика на нивната возраст, верска или етничка припадност.
Отпадот и загадувањето на Вардар остануваат предизвик
Една од темите на кои Костадиноски се осврна е управувањето со комуналниот отпад и проблемот со незаконското одлагање отпад на потегот меѓу Општина Јегуновце и Општина Желино.
Од општината информираат дека домаќинствата се опремени со канти и дека комуналниот отпад редовно се собира. Сепак, сериозен предизвик претставува несовесното одлагање комунален и градежен отпад во тампон-зоната меѓу двете општини, особено во близина на течението на реката Вардар.
„Во овој период се соочуваме со проблем на несовесно одлагање отпад на потегот меѓу Јегуновце и Желино. За состојбата се известени сите надлежни институции, меѓу кои МВР, комуналниот инспектор и инспекторот за животна средина. Се надевам дека преземените активности ќе завршат успешно и дека овој проблем конечно ќе биде решен“, посочи Костадиноски.
Од општината очекуваат преземените мерки да придонесат за спречување на понатамошното загадување и за трајно решавање на проблемот со незаконското одлагање отпад на оваа локација.
Целта е да се обезбеди почиста и поздрава животна средина за жителите на Јегуновце и околните населени места, како и да се заштити реката Вардар од дополнително загадување.
Со отчетот во Жилче, градоначалникот Димитар Костадиноски ги презентираше досегашните активности и ги најави плановите за наредниот период, со акцент на инфраструктурниот развој, унапредувањето на комуналните услуги и заштитата на животната средина.
