Тимот на Мерцедес на трката во Бразил ја освои титулата кај конструкторите во овогодинешниот шампионат во Формула 1.
Возачите на Мерцедес, Џорџ Расел и Андреа Кими Антонели, ги освоија четвртото и петтото место, што беше доволно за да му дадат на германскиот тим недостижна предност од 140 поени пред второпласираниот Ферари, на три трки до крајот.
Директорот на Мерцедес, Тото Волф, изјави дека е исклучително горд на целиот тим, кој успеа да освои нова, деветта титула кај конструкторите во шампионатот во Формула 1 по пет години.
„Неверојатно е. Имавме многу добар почеток на сезоната и тоа ни помогна да ја постигнеме нашата цел, но последните неколку трки беа исто така предизвикувачки. Во некои моменти трката во Бразил беше тешка, но генерално сум исклучително горд на целиот тим“, рече Волф.
По долг период на напорна работа, Мерцедес успеа да се врати на врвот.
„Ни беа потребни пет години за да се вратиме на самиот врв. Не многу тимови успеаја да го направат тоа по таква ситуација. Тоа покажува колку одлична работа завршиле луѓето во нашиот тим и колку е убаво да се биде дел од сето тоа“, додаде директорот на Мерцедес.
Со освојувањето на деветтата титула во шампионатот на конструктори, Волф го израмни рекордот поставен од легендарниот Френк Вилијамс.
„Френк е легенда на овој спорт и никогаш не помислив дека ќе биде можно да се израмнам со него по бројот на освоени првенства. Бев блиску до Френк, а сега да бидам на исто ниво со него – неверојатно е. Не можам да верувам. Но, во нашиот тим има и такви со повеќе од девет титули, бидејќи беа дел од тимот на Рос Брон и го освоија шампионатот со Хонда“, подвлече Волф.
Првенството во Формула 1, во кое Кими Антонели веќе ја обезбеди титулата возач, продолжува за две недели со Големата награда на Лас Вегас.
Foto/ EPA
Преземено од: TopSport
