Со заедничка изложба вчеравечер во гостиварскиот Центар за култура АСНОМ се заокружи годинешното издание на Меѓународната ликовна колонија „Гостивар 2024“, која ја организира Здружението на ликовни уметници Драудакум.
Над 25 уметници од Македонија како и од Албанија, Турција, Србија и Косово, изминатите неколку дена во Гостивар ги создаваа своите дела во рамки на колонијата, која годинава го доживеа своето деветнаесетто издание.
„Упатувам благодарност до сите уметници за нивното учество во колонијата и им посакувам натамошни успеси во творењето. Благодарност и до сите оние кои го поддржуваат одржувањето на колонијата“, кажа меѓу другото на отворањето на изложбата, претседателот на Здружението, Арјан Руфати.
На настанот на уметниците учесници во колонијата им беа доделени благодарници. Меѓународната ликовна колонија „Гостивар 2024“ е поддржана од Министерството за култура и донатори.
Преземено од: GostivarPress
