Еко електричен автобус кој не прави бучава и не испушта штетни гасови денес беше презентиран во Гостивар. Во првата тура, возењето го испробаа градоначалникот Ваљбон Лимани со општинската администрација во придружба на претставниците на компанијата добавувач, Ауто Македонија.
„Денес сме на презентација на електричниот автобус кој воопшто не го загадува воздухот. Гостивар е дел од „Исузу Бас Еуро Тура 2024“. Граѓаните ќе можат да се повозат и да видат кои се придобивките Гостивар да има градски јавен превоз. Се надевам дека ова може да биде почеток на воспоставување на јавен превоз, ќе се направи студија и ќе видиме кои натамошни чекори ќе ги преземеме понатаму.“, изјави Лимани.
Според информациите кои ги дадоа претставниците на компанијата цените на ваквите автобуси се движат од 100.000 до 300.000 евра. На новинарско прашање дали општината има финансиска сила да набави вакви електрични автобуси, првиот човек на Гостивар одговори: „Доколку студијата покаже дека е исплатливо и е добро, се надевам дека ќе најдеме финансиски извори да го оствариме тоа.“
Автобусот што возеше низ Гостивар денес беше со капацитет од 25 до 29 лица, со пристап и за граѓани со попреченост.
„Дојдовме во Гостивар да промовираме нов, модерен електричен автобус којшто има 0 емисија на издувни гасови, не произведува никаков звук. Сакаме да дадеме можност гостиварчани да се возат во еден европски модерен автобус. Во оваа прилика сакам да се заблагодарам на градоначалникот што ни дозволи да се вклучиме во градскиот сообраќај.“, кажа Елена Тодорова, комерцијален директор на Ауто Македонија.
Тест возења на електричните автобуси ќе се организираат и низ други градови во Македонија.
Преземено од: GostivarPress
