Во Кабинетот на претседателката Гордана Сиљановска-Давкова денеска се одржа традиционалната церемонија на свечено менување на државното знаме, на која присуствуваа повеќе од 170 ученици од скопските основни училишта „Христијан Тодоровски–Карпош“, „Петар Поп Арсов“ и „Гоце Делчев“, придружени од своите наставници.
Според соопштението од Кабинетот на претседателката, по завршувањето на свечениот чин гостите ја разгледале работната околина на претседателката и во непосреден разговор со Сиљановска-Давкова ѝ поставувале прашања со голема заинтересираност и зрелост.
Тие се интересирале за секојдневните предизвици на функцијата, активностите што ѝ недостасуваат поради службените обврски, спомените од детството, образованието, професионалниот развој, како и за уметничките дела поставени во Кабинетот.
Претседателката, како што информираат од нејзиниот кабинет, им порачала на учениците да бидат свои, оригинални и критични, да веруваат во силата на знаењето, да другаруваат со книгите и да си ја сакаат татковината.
-На крајот од посетата, учениците ѝ подарија прекрасни цртежи и ракотворби, изработени со многу креативност и посветеност, а од Кабинетот си заминаа со насмевки и убави впечатоци, како што рекоа, стои во соопштението.
Церемонијата традиционално се изведува секој втор петок во месецот од страна на Баталјонот за почести при Армијата како израз на почит кон државните симболи и државата.
Преземено од: Линк
