Фудбалерите на Англија ја испуштија шансата да се пласираат во финалето на 23-то Светско првенство. Во спектакуларен меч, по пресврт загубија од актуелниот првак Аргентина 1:2.
Англичаните поведоа против Аргентина со голот на Ентони Гордон во 55-та минута, но Аргентина го доби дуелот со головите на Енцо Фернандез во 85-та и Лаутаро Мартинез во втората минута од судиското надополнување на времето.
Селекторот на Англија, Томас Тухел, од медиумите и навивачите е означен како виновникот за поразот. Најмногу му се забележува дека многу рано ги повлекл своите играчи во ниска зона.
„Разочарани сме. Бевме многу блиску, но откако постигнавме гол, станавме премногу пасивни и дозволивме многу шанси. Не успеавме да ја преземеме контролата врз поседот на топката, а потоа дозволивме толку многу центрирања, шанси и шутеви. Бевме блиску, но по голот, не успеавме да го одржиме истото ниво на игра“, рече тој во воведот и потоа ги прокоментира измените.
„Во претходните натпревари воведував и офанзивни играчи. Само се обидовме да му помогнеме на тимот. Веднаш ја искористивме можноста и решивме да преминеме со петмина во одбраната бидејќи се отвораа премногу празнини.
Тие ги добија сите воздушни дуели и постојано ја внесуваа топката пред нашиот гол, па затоа преминавме на игра со петмина во задната линија за да го затвориме просторот во средината и да бидеме посилни во воздухот. Веднаш по нашиот гол, пред какви било промени, дозволивме премногу центрирања и премногу шанси, па затоа се обидовме да му помогнеме на тимот. Секако, одговорноста е на тренерот и, кога работите не завршуваат добро, лесно е да се каже дека одлуката била погрешна.“
За обидот да се постигне втор гол: „Да, но не ви помага ако не можеш да стигнеш до топката. Не можевме да излеземе од нашата половина. Секако дека сакавме да постигнеме втор гол, но не чувствував дека офанзивните промени ќе ни помогнат. Останавме во формација 4-4-2, но станувавме сè попасивни.
Не успеавме да освоиме ниту една топка или да ја задржиме, па не мислам дека проблемот беше во системот. Не сме промениле ништо, но играта целосно се промени. Нема проблем, разбирам дека се дискутира за тоа. По натпреварот, има милиони тренери кои знаат сè подобро.“
Foto/ EPA
Преземено од: TopSport
