Министерот за здравство Клековски не разговарал со неговата бугарска колешка за здравствената состојба на Ива Михаилова. Бугарија е во предизборен период, вели Клековски и заедно со бугарската министерка за здравство имало премолчена согласност да не се отвора темата Михаилова, но и дека тоа е прашање во доменот на правдата.
Во меѓувреме се чекаат мислењата и надзорот од македонските институции, со оглед на тоа што Михаилова одела на здравствени прегледи во Кочани, Штип и Скопје. Кога ќе се соберат сите, ќе ја има комплетната слика. Има повеќе прекршоци како е воден случајот во формалниот дел, вели Клековски, а доколку некој доктор издал мислење дека таат реба да се лекува во странство, ќе имало друга процедура, а таква постапка за Михаилова нема.
Премиерот Мицкоски пак не сака да им посветува внимание на реакциите од бугарска страна околу бегството на Михаилова, бидејќи смета дека станува збор за предизборен фолклор во Бугарија.
„Имам што да одговорам, но мислам дека поединци не заслужуваат да бидат во центарот на вниманието и ваков тип на естрада што денеска ја гледаме таму, а е поврзана со фолклорот за нивните претседателски избори не заслужува коментар и мислам дека треба и да ги игнорирате и вие како поединци“, рече Мицкоски.
Во меѓувреме министерството за правда чека Михаилова да биде лоцирана или приведена од бугарските власти за да може да се побара нејзина екстрадиција. Бугарскиот министер за внатрешни работи соопшти дека ниту ја бараат, ниту ќе ја екстрадираат.
Македонската полиција и институции се уште утврдуваат како Михаилова избега од Македонија, без пасош и со лична карта која и е вон употреба.
Преземено од: Линк
