Во Спомен-паркот во село Непроштено денеска се одржа комеморативно одбележување по повод 25 години од киднапирањето и убиството на Македонци за време на конфликтот во 2001 година.
Со настанот беше одбележана годишнината од убиството на Стојан Михајловски, како и од исчезнувањето на Крсто Гоговски, Цветко Михајловски и Васко Михајловски. Тие се меѓу 12-те Македонци кои беа киднапирани за време на конфликтот во 2001 година.
Членови на семејствата на жртвите, жители на Непроштено, претставници на институциите и бројни граѓани положија свежо цвеќе и оддадоа почит на жртвите, потсетувајќи на трагичните настани кои оставија длабока болка кај нивните најблиски и во македонското општество.
Од присутните беше упатена порака дека споменот на жртвите мора да се негува и да се пренесува на идните генерации, со надеж дека вакви трагедии никогаш повеќе нема да се повторат.
