Поранешниот репрезентативец на Мали и ексиграч на Истра 1961, Калилу Траоре, загина во сообраќајна несреќа вчера, 24 јули, на 38-годишна возраст, објавија локалните медиуми.
Веста за неговата прерана смрт ја потресе фудбалската јавност, особено навивачите во Пула, Хрватска, каде што Траоре остави длабока трага.
Како дефанзивен играч од средината, Траоре за репрезентацијата на Мали одигра 17 натпревари и постигна еден гол. Беше дел од генерацијата која во 2013 година освои бронза на Африканскиот куп на нации.
Траоре во Истра 1961играше од 2008 до 2010 година. Пристигна од мароканскиот клуб Видад и веднаш ги освои симпатиите на навивачите со својата техника, преглед на играта и силниот удар.
Особено се истакна во сезоната 2008/09, кога со девет голови беше најдобар стрелец на тимот и еден од најзаслужните за враќањето на Пулјаните во највисокото ниво на хрватскиот фудбал. Во зелено-жолтиот дрес одигра 52 првенствени натпревари и постигна 14 погодоци, со што се вброи меѓу најдобрите играчи во историјата на клубот.
По две успешни сезони во Истра, Траоре замина во данскиот Оденсе, а во 2012 година премина во францускиот Сошо, каде што ја заврши кариерата во 2014 година, на само 27 години.
Преземено од: TopSport
