МЕПСО бара речиси двојно зголемување на цената за пренос на електричната енергија од следната година.
Во барањето доставено до Регулаторната комисија за енергетика, компанијата предлага тарифата да се зголеми за 97,68 проценти.
Од другите енергетски компании, МЕМО не бара промена на тарифата. Кај Електродистрибуција сè уште не е познато дали ќе бара поскапување, бидејќи не е завршена постапката за набавка на струја за покривање на загубите во мрежата.
Сепак, најважен дел од пресметката ќе биде цената по која ЕСМ ќе му ја продава струјата на ЕВН Хоум.
Од следната година, државните електрани 70 проценти од произведената електрична енергија ќе ја продаваат по регулирана цена, а останатите 30 проценти по комерцијални цени.
Во моментов, ЕСМ ја продава струјата за домаќинствата по цена од 65 евра за мегават-час.
За да се утврди колку ќе плаќаат граѓаните, прво ЕСМ треба да ја достави новата понуда, а потоа РКЕ да одлучи за тарифите за пренос и дистрибуција.
Дури откако ќе бидат познати сите цени, ќе се знае колкави ќе бидат сметките од Нова Година.
Премиерот Мицкоски досега неколкупати изјави дека Владата ќе се обиде да спречи поскапување на струјата од 1 јануари.
Во меѓувреме, неизвесно е и дали граѓаните во Скопје ќе добијат повисоки сметки за парно. Сите четири компании за топлинска енергија поднеле барања до РКЕ за корекција на цената која е во сила од август.
Парното годинава поскапе двапати за вкупно 11%.
Цената на природниот гас на берзите достигна речиси 90 евра за мегават, највисоко ниво од декември 2022 година.
Преземено од: Линк
