Гостиварската публика ќе има можност да го наполни срцето и да ужива во изведбите на Националниот фолклорен ансамбл „Танец“. Концертот на амбасадорите на македонската народна уметност и култура низ светот ќе се одржи на 14-ти март (четврток) во Центарот за култура АСНОМ во Гостивар, со почеток во 19 часот.
„Танец“ е првиот професионален фолклорен ансамбл во Македонија, формиран во 1949 година со цел да ги собира и негува македонските традиционални песни и игри, народните носии и инструменти, и преку соодветен уметнички израз, сценски да ги претставува највредните форми од богатата ризница на македонскиот народ. Во текот на своето 75 годишно постоење има учествувано на повеќе од 5000 концерти и фестивали, настапувајќи пред полни концертни сали во Њујорк, Сиднеј, Мелбурн, Тел Авив, Рим, Париз, Лондон, Монтреал, Торонто и многу други светски метрополи. Репертоарот се состои од повеќе од 90 кореографии и неколку стотици вокални и инструментални творби, преку кои ансамблот ги претставува разновидните музички и кореографски традиции од богатиот македонски фолклор.
„Танец“ во Гостивар ќе настапи со 32 члена кои ќе се претстават со циклус наречен „Изворни минијатури“, дел од серијата концерти кои ансамблот ги одржува низ земјава.
„МИНУТИ ЗА СЕКОГО“ | Фејзи и Ѓурчиновска | ЖЕНИТЕ ОД РУРАЛНИ СРЕДИНИ
Преземено од: Линк
