Министерството за земјоделство, шумарство и водостопанство, по барање на ЈП „Национални шуми“, донесе одлука за воведување на целосна забрана за движење во шумите и шумското земјиште на територијата со која управува ЈП „Национални шуми“. Оваа мерка се воведува со цел превенција од појава на шумски пожари на отворен простор, согласно членот 57, став 3 од Законот за шумите.
Забраната стапува на сила од денес, 15 јули 2024 година, и ќе трае до нејзиното отповикување. Во овој период, движењето во шумите ќе биде строго забрането во терминот од 06:00 до 20:00 часот. Исклучок од оваа забрана ќе биде направен само за лица кои ќе добијат писмено одобрување од подружниците на ЈП „Национални шуми“ за подрачјето со кое тие управуваат.
Непочитувањето на оваа забрана ќе се санкционира со глоба од 1.500 до 2.000 евра во денарска противредност, согласно член 106 од Законот за шумите. Министерството апелира до сите граѓани да ја почитуваат оваа мерка со цел да се спречи појавата на шумски пожари и да се зачува природата.
Преземено од: GostivarPress
