Во предвечерието на празникот Рождество на Пресвета Богородица, пред храмот во Скопје посветен на големиот празник свечено беше пречекана Богородичната икона „Троеручица“ од светогорскиот манастир Хиландар.
Иконата од Света Гора ја донесоа проигуменот на свештената хиландарска обител, Архимандритот Методиј, во придружба на уште неколкумина хиландарски монаси, свештеномонаси од Скопската епархија и претставници на семејството Андревски – дарителите на иконата и покровителите на нејзиното доаѓање во Скопје.
Иконата беше пречекана од Архиепископот Охридски и Македонски г. г. Стефан, Митрополитите Брегалнички г. Иларион, Тетовско-гостиварски г. Јосиф и Епископот Стобиски г. Јаков.
По внесувањето на иконата во храмот „Рождеството на Пресвета Богородица“, беше отслужена Празнична вечерна богослужба на којашто со благослов и во молитвено присуство на Архиепископот, чиноначалствуваше Митрополитот Иларион. На Вечерната беше извршена и голема Литија околу центарот на Скопје, со масовно учество на верници.
По Молитвениот собир, Архиепископот одржа беседа, па во знак на благодарност за донесената икона,на Архимандритот Методиј му подари граден крст, а на семејството Андревски му го додели Архиепископското одличие „Архиепископ Доситеј“.
фото:тетовско-гостиварска епархија
Преземено од: GostivarPress
