Болката во грбот го придружува човекот најверојатно од почетокот на неговиот развој, па се до денес. Ова е цената на еволуцијата – преминот од четвороподно во исправено одење му овозможило на човекот да доминира на Земјата, но и да го оптоварува ‘рбетот.
Првите проблеми може да се појават веќе околу 30-тата година од животот. Тоа е резултат на нездрав начин на живот, со премалку движење и премногу седење на работа, во слободно време, на компјутер, во автомобил и слично.
Видови и превенција на болки во грбот
‘Рбетот е коскена колона долга околу 75 см кај мажите и 65 см кај жените. Се состои од 33 пршлени кои се поврзани еден со друг во цервикалниот, торакалниот и лумбалниот регион со интервертебрални дискови, а во сакрумот и кокцигеумот се споени за да се формираат истоимените коски. Поддржан е од околу 140 мускули кои ги контролираат неговите движења – од мускулите на вратот, грбот и градите, до мускулите на стомакот и карличниот под.
Од 33 пршлени, 24 од нив се поврзани со интервертебрални дискови кои еластично ги распределуваат оптоварувањата. Во секој диск има надворешен прстен за поврзување, а во средината меко јадро, кое како пружина ги омекнува ударите при преносот на силите. Тие јадра кај младите содржат до 88% вода. Промените во мекиот дел на јадрото започнуваат веќе во пубертетот, а со возраста содржината на течноста се намалува на дури 70%. Сепак и покрај промените во интервертебралните дискови, нивното оптоварување не се намалува со возраста.
Акутната болка во грбот се јавува ненадејно, најчесто по некое „незгодно“ движење или подигнување на тешки предмети, при што се чувствува болка во долниот дел на грбот. Болката може да биде толку силна што пациентот моментално останува замрзнат во одредена положба. Ако нервот што излегува од ‘рбетот во тој момент е притиснат, болката „седи“ покрај ногата, понекогаш сè до стапалото. Таквата состојба ја нарекуваме лумбошиалгија или „ишијас“.
Хронична болка во грбот
Хроничната болка во грбот е болка која трае повеќе од 14 дена и е резултат на долготрајни, хронични процеси на стареење и абење и кинење на ‘рбетот (дегенеративни промени). Деформираните пршлени и дискови, воспалението на малите зглобови и промените во лигаментите и мускулите може да ги притиснат нервните структури предизвикувајќи болка. Тогаш болката е долготрајна или се јавува повремено со чувство на вкочанетост, но секогаш е поблага од акутната.
Болката е знак дека нешто не функционира како што треба, но секогаш е подобро да се инвестира во здравствената заштита и да не се чека да се појави болка.
Преземено од: GostivarPress
