Во време на криза минималната плата ја дигнавме од 8 на 22 илјади денари, просечната од 22 на 42 илјади денари. Првиот човек на опозициската СДСМ Венко Филипче во Тема на денот вели – главната разлика кога неговата партија предводеше со Владата и сега е што во моментов нема криза во Европа, а тие морале да се справат и со Ковид и со последиците од воената инвазија на Русија во Украина. Вели, инфлацијата од 4,8% е далеку над проектираната – под 3%.
– Запре растот на платите. Растот на платите беше некаде, гледам дека има некаква шпекулација, мислам дека премиерот манипулира со бројките. Има индексни цени, има и вистински номинални бројки. Кога двете ќе ги споредите, растот на платите во времето на СДСМ индексно гледано беше 11%, сега е 4%. Ако сакате во номинални бројки растот на платите тогаш, за време нашата влада беше 15%, а сега е само 8%, вели Филипче.
Власта и опозицијата различно ги читаат бројките од официјалната државна статистика. За власта, реалниот раст на платите е двојно поголем за една година. Пратеникот од ВМРО-ДПМНЕ вели дека реалниот раст на платата од јули лани до јули оваа година е 6,7%, додека за периодот јули 2017 до јули 2024 растот бил само 3,5%.
– Растот на реалната плата во време на ВМРО-ДПМНЕ покажува неколку работи: Дека инфлацијата е намалена. Дека растот на економијата е забрзан. Дека потрошувачката е зголемена. Дека производството расте. Дека довербата во економијата е голема. Бројките јасно покажуваат дека инфлацијата е стабилизирана и под контрола, вели Стојаноски.
Филипче во гостувањето во Дневникот на Сител зборуваше и за критиките од премиерот дека опозицијата не е конструктивна туку само критикува. Вели, власта не прифаќа предлози кои доаѓаат од опозицијата.
Говорејќи за евроинтеграцискиот плат на државата, Филипче вели дека и на СДСМ кога беше власт, и на ВМРО-ДПМНЕ тогаш како опозиција и денес како власт им е јасно дека друга опција освен почитување на Францускиот предлог и гласање на уставните измени за внес на Бугарите – нема. Повика власта да ги донесе уставните измени, да се донесе Резолуција во Собранието со кое, доколку Македонија по внесот на Бугарите во Уставот добие нов услов од Софија – тогаш државата да ги прекине преговорите со Брисел за влез во ЕУ.
Опозициската СДСМ во моментот е фокусирана на првиот круг од претстојните локални избори. Филипче уверува дека во моментот СДСМ нема никаква соработка со ДУИ и вели дека нивниот впечаток е оти ДУИ веќе почнува соработка со ВМРО-ДПМНЕ.
Преземено од: Линк
