Американскиот претседател Доналд Трамп планира утре во Белата куќа да се сретне со четворицата високи претставници на Конгресот, еден ден пред крајниот рок за постигнување договор за финансирање на федералната влада.
Тој ќе разговара со претседателот на Претставничкиот дом, Мајк Џонсон, и лидерот на мнозинството во Сенатот, Џон Тун, како и со лидерот на демократите во Претставничкиот дом, Хаким Џефрис, и лидерот на малцинството во Сенатот, Чак Шумер.
Демократите, главно во Сенатот, одбија да гласаат за да се донесе мерка за финансирање што ќе им овозможи на федералната влада и на нејзините подредени агенции да продолжат со работа. Во спротивно на полноќ во среда ќе настапи привремено запирање на нивната работа.
Демократите веруваат дека имаат влијание и бараат клучни здравствени одредби во замена за нивните гласови, забележуваат агенциите. Тие сакаат да ги прошират субвенциите што им помагаат на луѓето со ниски и средни приходи да имаат здравствено осигурување според Законот за достапна заштита. Демократите, исто така, се залагаат за укинување на скратувањата во програмата Медикејд, кои беа вклучени во главниот буџет на републиканците. Републиканците велат дека тие барања се неприфатливи и се подготвени да разговараат за нив со демократите одделно од дискусиите за финансирање на владата. Републиканската партија бара седумнеделно продолжување на сегашното финансирање.
МИА
Преземено од: Линк
